Mi trovis utilan frazon en intervjuo:

[Kiu estas la plej malbona eraro kiun vi vidis en programkodo?] Programojn sen komentoj/dokumentado - mi malŝategas kiam homoj diras "legu la kodon" - la kodo estas la solvo al la problemo - per legado de la kodo mi devas diveni kiu estis la problemo, kaj tio portas al eraroj. Mi ŝatus ke oni klarigu kiu estis la problemo, ne ke mi divenu. [Fonto de la citaĵo]

Mi opinias ke tiu donas tre utilan gvidon al kiam kaj kiajn komentojn skribi por kodo. Mi ŝajne ja malatentis ofte tion pri la konstatigo de la problemo, kaj pli (aŭ nur) parolis pri la solvo.

Unu el la grandaj problemoj pri la uzo de densigitaj dosieroj estas tio, ke oni malfacile iras al gxusta lega/skriba pozicio de densigita dosiero. Densigiloj densigas fluon de datumoj al alia fluo de datumoj malpli granda. Tamen, la iro al pozicio X de la originala fluo ofte okazigas ke necesas elkodigi la tutan densan fluon gxis la atingo de la Xa originala pozicio.

Solvas tiun problemon interesa ilo, kiun mi konas de antaŭ longe. Temas pri aldona informo al gzip dosiero, laŭ kiu la densigitaj dosieroj pli grandas, tamen eblas iri elkodigi por iu ajn pozicio de la originala dosiero per malmulta peno. Tion uzas dict, kaj la ilo nomiĝas dictzip. Oni ĝin uzas simile al gzip, kaj eĉ gzip povas senprobleme elkodigi ĝin. Ja avantaĝiga ideo.

Mi plu atendas ke iu profite uzu tian teĥnikon en ia operacisistema tavolo, por ke programoj povu (almenaŭ) legi densigitan dosieron kvazaŭ ĝi ne estas densigita.

Ŝajne iu kodoteko permesas uzi tiajn dictzipajn dosierojn facile.